Qadının, namaz qılarkən üz, əl, topuqlar xaric vücudunun geri qalan hər tərəfi övrət yeri hökmündədir, mütləq örtülü olmalıdır. Örtülən paltarın da özünəməxsus şərtləri vardır. Yəni paltar dar və incə olmamalıdır. Qadının geyindiyi paltar kişilərin geyindiyi paltara bənzəməməlidir. Qadınların geyindikləri şalvar nə qədər gen-bol olsa da qadın üçün vacib olan təsəttürü tam təmin etmədiyi üçün məkruhdur və imkanlar ölçüsündə tərcih edilməməlidir. Şalvar geyinmə məcburiyyətində qalan xanımlar, ən azından dizlərinə qədər gələcək bir paltar geyməlidirlər. Təsəttür, kəlimə mənası örtünmək olsa da, termin olaraq sadəcə örtünməklə məhdudlaşdırıla bilməz. Təsəttür eyni zamanda qadının halını, davranışlarını və qadınlıq yönünü də əhatə edir. Buna xüsusən həm namazda, həm gündəlik yaşayışımızda diqqət etməliyik. Namaz qılan xanım əgər şalvarın üstünə geyəcək bir şey tapa bilməzsə, namazı qəzaya buraxmamalıdır. Məkruh da olsa şalvarla namazı qılmalıdır.
Kim Ramazanda inanaraq və savabını Allahdan gözləyərək, Onun rizasını qazanmaq üçün qiyam edərsə (təravih namazı qılarsa), keçmiş günahları bağışlanar.
İmsak dan yeri ağarmağa başlayandan (imsak vaxtından), iftar (axşam namazı) vaxtına qədər ibadət niyyəti ilə yemək, içmək, cinsi əlaqə və digər orucu pozan şeylərdən uzaq durmaq deməkdir. İmsakın ziddi iftardır.
Namaz qılan şəxsin qabağından insanlar rahat keçsin deyə qoyuduğu maneəyə (kürsü, stul, çanta və s.) sütrə deyilir. Divar və ya sabit bir şey də (dirək, ağac, namaz qılan şəxs və s.) sütrə sayılır. Sütrəyə əməl etmək sünnədir.
Qurani-Kərimdə on dörd səcdə ayəsi var. Bu ayələrdən hər hansı birini oxuyan və ya dinləyən səcdə etməlidir. Həmin səcdəyə tilavət səcdəsi deyilir.
Rəsulullah (s.ə.s) beş vaxt fərz namazdan əlavə nafilə namazlar qılaraq ibadət həyatını gözəlləşdirmişdir. Peyğəmbərimizin (s.ə.s) qıldığı nafilə namazlardan biri də duha namazıdır. Duha kəlməsi ərəb dilindən tərcümədə “səhər və ya quşluq vaxtı” deməkdir. Quranın 93-cü surəsi də “Duha” surəsidir. Duha namazına quşluq namazı da deyilir.